Er einhvern sem getur sannfært mig um að greiðsla viðbótarlífeyrirssparnaðar inná lán sé gáfulegt?

Hver ætlar að sannfæra mig um það að það sé einhver brú í því að greiða niður verðtryggt lán með viðbótalífeyrissparnaði og um leið verða af 2 ára söfnun inná væntanlegan ellilífeyrissjóð með þeim vöxtum og vaxtavöxtum sem því fylgir? 

Eitt væri að greiða niður óverðtryggt lán en annað að greiða niður, ef hægt er að segja greiða niður, verðtryggt lán. Mjög grófleg ágiskun er að væri ég t.d. að safna ca. 300.000 kr á tveggja ára tímabili í viðbótalífeyrissparnað sem ég greiddi inná lánið mitt ca 20 milljónir, þá væri lánið búið að hækka um tæplega 2 milljónir yfir sama tveggja ára tímabil með svipaðri verðbólgu og núna, en gróflega reiknað. Hvar stæði ég þá? Jú lánið vær sem sé búið að hækka um 1.700.000 miðað við þetta.

Þegar þú selur svo fasteignina sem þú ert að eyða ellilifernum þínum í þá verða þessi 300.000 ekki mikils virði ef þú ert svo óheppinn að selja þegar verðið er lágt, kannski ertu heppinn og selur þegar verðið er hátt og þá skipta þessi 300.000 ekki miklu. Sama hvernig þú lítur á þetta þá ertu að greiða inná lán sem þú veist ekkert um hvernig málin þróast með. Þú veist ekkert hvenig verð á húsnæði þróast, verðbólga, hvort verðtrygging verði afnumin.

Sumir " sem allt vita " hæðast að þeim sem telja þetta ekki hagkvæmt og vilja ekki viðurkenna að þetta endurgeiðsluform er ekki endurgreiðsla. Þetta er hugarleikfimi sem fær "snillingana" til að halda að þeir séu að fá uppfyllt loforðið sem fékk þá að kjósa framsókn.

Svo ef það eru einhver rök með þessu þá væri gaman að heyra það.  

 

Athugasemdir

[Kjartan Sigurgeirsson, 29.11.2013 kl. 11:51]

Þessari spurningu verður ekki svarað fyrr en þú nærð eftirlauna aldri, verða eftirlaun þín þá góð, eða kemur séreignasparnaðurinn til með að standa undir eftirlaunum.  Ef verðbólgan æðir áfram munar mikið um það sem höfuðstóll láns er lækkaður áður en hún fer af stað. Ég býst frekar við að talsverður fjöldi lífeyrisgreiðenda hefði gefið mikið fyrir að hafa fengið tækifæri til að lækka lánin með séreignasparnaðinum áður en hrunið varð.  Þú þyrftir eiginlega kristalskúlu til að finna út úr þessu.

[Brynjólfur Tómasson, 29.11.2013 kl. 12:41]

Já við erum heldur ekki að tala um í þessu tilviki að fá að taka út einhverjar milljónir til að greiða niður lánin heldur erum við að tala um þann lífeyrissparnað sem hægt er að safna sér á þessu tímabili. En já rétt er það, það er ekki til neytt eitt svar hver en eins og við vitum þá er þörf á því að lækka þá greiðslu sem lífeyrisþegar fá og síðast í gær gaf Fjármálaeftirlitið það út að trúlega væri fyrirsjáanlegt að lækka þyrfti greiðslur til lífeyrisþega.

[Kjartan Sigurgeirsson, 29.11.2013 kl. 13:49]

Svolítið sorgleg stefna ef það á ekki að leiðrétta hlut lífeyrisþega, ég hélt að það væri öllum orðið ljóst hvílíkt óréttlæti það er að þeir sem hafa verið skattlagðir um 10 - 12% af tekjum alla starfsævina, fái ekkert út úr því, þar sem hlutur þeirra frá Tryggingastofnun er rýrður um krónu á móti hverri krónu sem fæst úr illa ávöxtuðum lífeyrissjóðum. Það endar eflaust með því að gamla fólkið í landinu verður að raða sér á öskutunnurnar til að leita að matarleyfum, hafi það ekki verið ríkisstarfsmenn alla starfsævina.

[Jósef Smári Ásmundsson, 1.12.2013 kl. 16:26]

Afnám verðtryggingar á að sjálfsögðu að vera næsta skref. Þetta útspil ríkisstjórnar kom mér þægilega á óvart, bjóst ekki við miklu. Að láta bankana taka borga er bara ánægjulegt. Varðandi kjör aldraða þá tel ég að eigi að leggja lífeyrissjóðskerfið niður, færa fjármuni þess til Almannatrygginga og jafna lífeyri að fullu þ.e. Allir fái sömu upphæð . Það myndi hækka lífeyri þeirra sem minna hafa í dag en að sjálfsögðu lækka greiðslur hálaunamannanna. En þeir hafa jú meiri möguleika en hinir að koma sér upp aukasparnaði. Þessi aðgerð ,bæði sameiningin og eins jöfnunin myndi minnka stjórnunarkosnaðinn stórlega. Veit að þetta er stór draumur en að setja auka skatt á fjármálafyrirtækin taldi maður nú reyndar líka óhugsandi. Kannski erum við að sjá hugarfarsbreytingu hjá stjórnvöldum.